Målet med kommunebilde
Statsforvaltaren har ansvar for å rettleie kommunane på mange område. Vi har derfor jamleg kontakt med kommunane. Kommunebilde hjelper oss med å samle og systematisere kunnskap om kvar kommune, og vi brukar kommunebilde som grunnlag for dialog i møte og ved kommunebesøk.
Målet med kommunebilde er å peike ut område der kommunen bør setje inn tiltak for å sikre forsvarlege og berekraftige tenester.
Verktøyet gjer det òg enklare å tilpasse bruken av våre verkemiddel etter kommunen sine behov – til det beste for innbyggjarane.
Grunnlaget for kommunebildet er analysar, statistikk, tilsyn, klagesaker og kommunale styringsdokument. Verktøyet viser situasjonen i kommunen på eit gitt tidspunkt. Informasjonen er tilgjengeleg for alle, og kan gi kommunalt tilsette og politikarar nyttig innsikt i lokale utfordringar.
Eit kommunebilde viser vurderingar av kommunens styrkar og svakheiter, og dessutan eit framtidsbilde der vi vurderer kommunens grad av berekraft og handlingsrom.
Vurderingane våre er visualiserte med trafikklys:
- Grøn: God tilstand
- Gul: Middels tilstand
- Raud: Svak tilstand
Fargen speglar kvalitet, sårbarheit og berekraft, og dessutan risikoen for avvik frå lov, forskrift eller god praksis. Saman med fargen følgjer det ei kort vurdering og grunngjeving.
Vi har som mål å besøke 8 - 10 kommunar per år, der kommunebildet er grunnlaget for dialogmøte.