Tilsynskalender
Slik sikrar vi at lover og reglar blir følgde
Vi gjennomfører tilsyn for å sikre rettstryggleiken til innbyggjarane. Føremålet med tilsyn er å kontrollere om regelverket blir følgt, men det skal òg bidra til forbetring og læring.
Statsforvaltaren fører tilsyn på mange område, til dømes
- barnevern
- helse- og omsorgstenester
- rettar i opplæringslov og barnehagelov
- miljø og forureining
- sosialtenester
- samfunnstryggleik og beredskap
- folkehelsearbeidet til kommunar og fylkeskommunar
- rettar i integreringslova
Vi fører òg tilsyn på mange andre område, mellom anna barnehage, skule, kommunen sitt krisetilbod, familievernkontor og tilsyn med asylmottak der det bur einslege mindreårige flyktningar.
Vi gjennomfører stadlege og skriftlege tilsyn. På førehand informerer vi som regel om at vi skal gjennomføre tilsyn, men vi kan òg kome uanmelde. Vi informerer også om tema for tilsynet og kva for informasjon og dokumentasjon vi treng.
Ved skriftlege tilsyn gjer vi undersøkingar og vurderingar på grunnlag av skriftleg dokumentasjon og/eller spørjeundersøkingar. Ved stadlege eller digitale tilsyn blir den skriftlege dokumentasjonen supplert med møte, intervju og/eller synfaringar.
Av og til har vi møte med verksemdene vi fører tilsyn med, systemrevisjon og eigenkontroll.
Etter tilsynet skriv vi ein rapport. Der skildrar vi det vi har sett, og om vi har funne brot på regelverket. Dersom vi finn brot på regelverket, gir vi pålegg om retting og ein frist for å rette opp forholda. Vi følgjer opp til vi ser at forholda er retta.
Statsforvaltaren har ansvar for å sikre at tilsynsaktiviteten ikkje overbelastar kommunane. For å samordne dette arbeidet bruker vi, saman med alle etatar som fører tilsyn med kommunane – mellom anna fylkeskommunen – ein felles tilsynskalender.